ଶ୍ରୀ ଶ୍ରୀ ରାମଲୀଳା ନାଟ୍ୟ ସଂସଦ, କୁଶପଙ୍ଗୀ

"ଚୈତ୍ର ମାସ ଶୁକ୍ଳ ପକ୍ଷ ନବମୀ ତିଥି ଶାନ୍ତି ମୈତ୍ରୀ ସୌହାର୍ଦ୍ଦ୍ୟର ସେହି ପବିତ୍ର ମୁହୂର୍ତ୍ତ, ଯାହା ଆମ ଚିନ୍ତା ଚେତନାର ଚୌହଦିକୁ ପରମ ପୁରୁଷୋତ୍ତମ ପ୍ରଭୁ ଶ୍ରୀରାମଙ୍କ ଶ୍ରୀପୟର ଯୁଗଳ ସହିତ ଯୋଡି ଦିଏ। ସେହି କୋମଳ ଶ୍ୟାମଳ ଶାନ୍ତ ମୂର୍ତ୍ତିଙ୍କ ଅଲୌକୀକ ଉପସ୍ଥିତିରେ ମୁଖରିତ ହୋଇଉଠେ ଆମ ଗାଁ। ମନ ହୋଇଯାଏ ରାମମୟ, ବିଞ୍ଚିହୋଇଯାଏ ସ୍ନେହ, ପ୍ରେମ, ଏକତା, ଭ୍ରାତୃତ୍ୱ ଓ ଭାଇଚାରାର ଏକ ଅଦମନୀୟ ଉତ୍ସାହ। ଗାଁର ଆବାଳ ବୃଦ୍ଧ ବନିତା ସମସ୍ତଙ୍କ କାନରେ ଯେମିତି ଶ୍ରୀରାମ ନାମ ଗୁଞ୍ଜରିତ ହେଉଥାଏ, ମନରେ ସେମିତି ସମର୍ପଣ, ଆଦର୍ଶ ଓ ନୈତିକତାର ଏକ ଜୁଆର ସୃଷ୍ଟି ହେଉଥାଏ। ଏହା ଏକ ଅବ୍ୟକ୍ତ ଉପଲବ୍ଧି ଯାହା ଶବ୍ଦରେ କହିବା ସମ୍ଭବ ନୁହେଁ। ଆଉ ଏହାର ସମସ୍ତ ଶ୍ରେୟର ଅଧିକାରୀ ମୋ ଗାଁ କୁସୁପଙ୍ଗିର ଶ୍ରୀ ଶ୍ରୀ ରାମଲୀଳା ନାଟ୍ୟ ସଂସଦ। ଧନ୍ୟ ଏହାର ସୃଷ୍ଟିକର୍ତ୍ତା, ଧନ୍ୟ ଏହାର ସମସ୍ତ ସହଯୋଗୀବୃନ୍ଦ। ଆପଣଙ୍କୁ ଶତକୋଟି ପ୍ରଣାମ। ଆଜି କି କାଲି ନୁହେଁ, ୧୯୪୨ ମସିହାରୁ ନିରନ୍ତର ଭାବେ ଗ୍ରାମବାସୀଙ୍କ ଅକୁଣ୍ଠ ଭଲ ପାଇବା ଯୋଗୁ ଏହି ଅନୁଷ୍ଠାନ ତାର କର୍ତ୍ତବ୍ୟ ପଥରେ ଆଗେଇ ଚାଲିଛି।ରାମଲୀଳା ପରିବେଷଣ ମାଧ୍ୟମରେ ସମାଜକୁ ଏକ ସମୁଚିତ ମାର୍ଗରେ ପରିଚାଳନା କରିବାର ବାର୍ତ୍ତା ଦେଇ ଯୁବପିଢିଙ୍କୁ ପ୍ରଭୁ ଶ୍ରୀରାମଙ୍କ ଆଦର୍ଶରେ ଅନୁପ୍ରାଣିତ କରିବା, ହିଂସା, ଦ୍ୱେଷ, ସ୍ୱାର୍ଥ ଓ ବିଭେଦଠାରୁ ଉର୍ଦ୍ଧ୍ୱକୁ ଯାଇ ସମସ୍ତଙ୍କୁ ଏକତାର ସୂତ୍ରରେ ବାନ୍ଧି ରଖିବା ହିଁ ଏହାର ଲକ୍ଷ୍ୟ। ଯାହାର ଗୁରୁ ଦାୟିତ୍ୱ ନିର୍ବାହ କରିବା ସହଜ କଥା ନୁହେଁ। ଐତିହ୍ୟ, ପରମ୍ପରା, ସାହିତ୍ୟ, ସଂସ୍କୃତି ଓ ଲୋକକଳାର ଏହି ମହାଦ୍ରୁମ ତଳେ କେତେ ଯେ ପଥିକ ଆଶ୍ରିତ ହୋଇଛନ୍ତି, ଆଉ କେତେ କଳାକାର କାଳର କରାଳ ଚକ୍ରରେ ନିଜର ଅଭିନୟ ସାରି ଲେଉଟି ଯାଇଛନ୍ତି ତାହା କଳନା କରିବା କଷ୍ଟକର। ମୁଁ ମଧ୍ୟ ଦିନେ ଚାଲିଯିବି, ଆମେ ସମସ୍ତେ ଚାଲିଯିବା। ହେଲେ ଏ ଅନୁଷ୍ଠାନ ସେମିତି ବଞ୍ଚି ରହିଥିବ, ମୁହୂର୍ତ୍ତକ ପାଇଁ ମଧ୍ୟ ତାର ମହତ ଉଦ୍ଦେଶ୍ୟରୁ ବିଚ୍ୟୁତ ନ ହୋଇ ସେମିତି ଗୌରବର ଶିରି ବାନ୍ଧି ଛିଡା ହୋଇଥିବ। ଯାହା କି ହୁଏତ ଆମେ ଦେଖି ପାରିବା ନାହିଁ, ଦେଖିବେ ସେହିମାନେ ଯାହାଙ୍କୁ ଆମେ ଏପର୍ଯ୍ୟନ୍ତ ଦେଖିନାହେଁ। ଆଜିର ପିଢ଼ି ଚାଲିଯିବେ, ଆସନ୍ତା କାଲିର ପିଢ଼ି ଆସିବେ, ଆଉ ସମସ୍ତଙ୍କୁ କୋଳେଇନେବ ଏ ଅନୁଷ୍ଠାନ। ଯୁଗ ପରେ ଯୁଗ ବଦଳୁଛି, ଆଧୁନିକ ଯୁଗ ଯାଇ ଅତି ଆଧୁନିକ ଯୁଗ ଆସୁଛି। ମଣିଷ ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) ଯୁଗକୁ ଅତିକ୍ରମ କରିବାକୁ ବସିଛି। କ୍ରମଶଃ ଯନ୍ତ୍ର ଦୁନିଆର ବଶବର୍ତ୍ତୀ ହେଉଥିବା ଏ ମଣିଷର ଚେତନା, ବିବେକ ଓ ନୈତିକତାକୁ ଜାଗ୍ରତ ରଖିବା ପାଇଁ ଦିନେ ଏହି ଅନୁଷ୍ଠାନ ହିଁ ଏକମାତ୍ର ପଥପ୍ରଦର୍ଶକ ହୋଇ ରହିବ । ତେଣୁ ପ୍ରଭୁ ଶ୍ରୀରାମଙ୍କ ସେତୁବନ୍ଧ ବାନ୍ଧିବାରେ ଗୁଣ୍ଡୁଚି ମୂଷା ସଦୃଶ ବାଲୁକା କଣିକା ସମ ସହଯୋଗର ହାତ ବଢ଼ାଇ ଅନୁଷ୍ଠାନକୁ ଆଗ୍ରଗାମୀ କରିବା ନିମନ୍ତେ ଆମେ ଆଗେଇ ଆସିବା ହିଁ ଉତ୍ତରପିଢ଼ି ପାଇଁ ଆମର କର୍ତ୍ତବ୍ୟ ହେବ। ତେଣୁ ଆସନ୍ତୁ ମହତ ଉଦ୍ଦେଶ୍ୟ ନେଇ ଆମେ ସମସ୍ତେ ଏକାଠି ହେବା, ଆଗକୁ ବଢିବାର ସଂକଳ୍ପନେବା। ଜୟ ରଘୁନାଥ"